MNF MLA pathumte hian tun dinhmunah Dampa bialin bialtu MLA nei rih loh mahse, an theih ang angin Dampa bial mipuite chu buaipui a, ṭanpui zel an tum thu an sawi a. An bialtu MLA ṭhin Lalrintluanga Sailo ang maia bialtu MLA ṭha an neih leh ngei an beisei thu an sawi bawk a ni.

Dampa South bial mipuite hian MNF MLA pathumte hnenah hian, MNF sorkar laia hmunphiah kg 1 Rs 100 chung lama an hralh zung zung thu an lo sawi a. Chutih laiin tun sorkar hnuaiah hralh zawhna tur an hmuh loh thu leh man tlawmte tea an hralh thu an lo sawi a.  MNF MLA te hian a theih ang anga House-ah te lo aupui an tum thu mipuite hi an hrilh a ni.

Dampa bial an tlawh zawh hian MNF MLA te hian Thorang bial Marpara South an tlawh a. Mipuiin an lo lawm hle a, Party hrang hrang aṭangin voter 15 MNF-ah an lawmlut a. He hunah hian R Rohmingliana MLA chuan ration buhfai nasa taka tihto a nih tak avanga khulhna tur nei mumal lo an awm chu pawi a tih thu a sawi a. MNF sorkar laiin hmunphiah Rs 130/- tea an hralh laia tun sorkara hralhna an hmu mumal lo chu pawi a tih thu a sawi a. ZPM sorkar chu kuthnathawktute ngaihsaktu sorkar a ni lo a ni, a ti.